Agreement - TBC Pay
logo
homekeyboard_arrow_rightმომსახურების ხელშეკრულება

მომსახურების ხელშეკრულება

მოგესალმებით „თიბისი ფეი“-ის ვებ გვერდზე.

წინამდებარე ხელშეკრულების პირობები („ხელშეკრულება“) სავალდებულოა თქვენთვის და კომპანია „თიბისი ფეი“-სთვის.

გთხოვთ, ყურადღებით გაეცნოთ წინამდებარე პირობებს

ამ ვებ გვერდის სარგებლობისას, თქვენ ავტომატურად ეთანხმებით ამ ხელშეკრულების პირობებს და ვალდებული ხართ დაიცვათ ყველა ქვემოთ მოცემული პირობა, რომლითაც რეგულირდება თქვენ მიერ ჩვენი სერვისით სარგებლობა და სხვა მომსახურების პირობები. იმ შემთხვევაში, თუ არ ეთანხმებით ხელშეკრულებით გათვალისწინებულ პირობებს, ვალდებული ხართ დაუყოვნებლივ შეწყვიტოთ ჩვენი სერვისით სარგებლობა.

გთხოვთ გაითვალისწინოთ, რომ ზოგადი პირობების გარდა კონკრეტული მომსახურების მიღებისას შესაძლოა არსებობდეს განსხვავებული და სპეციფიკური წესები, რომლის შესახებაც თქვენ ინფორმაციას მიიღებთ კონკრეტული მომსახურების მიღების პროცესში.ზოგად პირობებსა და სპეციალურ პირობებს შორის შეუსაბამობის შემთხვევაში უპირატესობა მიენიჭება ამ ხელშეკრულების პირობებს.

ტერმინთა განმარტება

ჩვენ – შპს „თიბისი ფეი“, შემდგომში tbcpay.ge;

თქვენ – პირი (ფიზიკური პირი; იურიდიული პირი, რომლის სახელითაც ფიზიკური პირი მოქმედებს) რომელიც შედის ვებგვერდზე;

მომსახურება – ელექტრონული საგადახდო მომსახურება;

ხელშეკრულება – - წინამდებარე დოკუმენტი;

მიმღები – პირი, რომლის სასარგებლოდაც ხორციელდება გადახდა;

ვებგვერდით სარგებლობისას თქვენ:

  • ადასტურებთ, რომ ხართ სრულწლოვანი ქმედუნარიანი პირი, ან 16 წელს მიღწეული პირი და გაქვთ ნებართვა შესაბამისი პირებისაგან (კანონიერი წარმომადგენელი) დადოთ წინამდებარე ხელშეკრულება და მიიღოთ ვებგვერდის საშუალებით ონლაინ საგადახდო მომსახურება და განკარგოთ შესაბამისი თანხები;
  • ვებ-გვერდზე ავტორიზაციის გავლისას წარმოადგენთ ზუსტ და უტყუარ ინფორმაციას, რათა ისარგებლოთ ჩვენი მომსახურებით;
  • ვებ-გვერდის ავტორიზაციისას ინფორმაციის მოწოდება ხდება თქვენი საკუთარი სურვილით და ამისათვის თქვენ გაგაჩნიათ კანონმდებლობით, ან ხელშეკრულებით გათვალისწინებული უფლება/ნებართვა.
  • ადასტურებთ, რომ ჩვენ გვაქვს უფლება შევინახოთ თქვენ მიერ მოწოდებული ინფორმაცია ტრანზაქციების ისტორიის შექმნის და ვებ-გვერდის ფუნქციონირების სხვა მიზნებისთვის.
  • დაიცავთ საავტორო და ინტელექტუალურ უფლებებს. არ განახორციელებთ ვებგვერდზე არსებული ინფორმაციის სრულად ან რაიმე ნაწილის კოპირებასა და გავრცელებას, ნებისმიერი სახით და მიზნებისათვის;
  • დაიცავთ ავტორიზაციისას თქვენი პირადი ანგარიშის უსაფრთხოებას და კონფიდენციალურობას. არ გაუმჟღავნებთ ნებისმიერ მესამე პირს თქვენი ავტორიზაციისას შექმნილი პროფილის უსაფრთხოების მონაცემებს, რათა დაცული იყოს თქვენს პირად ანგარიშზე არსებული ინფორმაცია;
  • არ განახორციელებთ ისეთ ქმედებას, რომელიც საფრთხეს უქმნის ვებგვერდის გამართულ ფუნქციონირებას.
  • არ განახორციელებთ ისეთ ქმედებას, რომელიც აკრძალულია კანონმდებლობით, ამ ხელშეკრულებითა და მსგავსი ვებგვერდების საშუალებით ონლაინ საგადახდო მომსახურების მიღებისათვის დამკვიდრებული წესებით;
  • ადასტურებთ, რომ არ განახორციელებთ ისეთ ქმედებებს, რომელიც მიმართულია სხვა პირების პირადი და კონფიდენციალური ინფორმაციის, მათ ანგარიშის უსაფრთხოების კოდების გაგებისაკენ და სხვა მომხმარებლის პირადი აქტივის განკარგისაკენ.
  • ადასტურებთ, რომ არ განახორციელებთ ნებისმიერ უკანონო ქმედებას ჩვენი ვებგვერდის მეშვეობით, მათ შორის ისეთ ქმედებებს, როგორიცაა, ფულის გათეთრება, ტერორიზმის დაფინანსება ან ხელშეწყობა და უკანონო შემოსავლის ლეგალიზაციისაკენ მიმართული ქმედებები;

ჩვენ

“თიბისი ფეი” არის კომპანია, რომლის მიზანია, შესაძლებელი გახადოს ელექტრონული გადახდები (“მომსახურება”) ვებგვერდის, კერძოდ www.tbcpay.geმეშვეობით.

ვახორციელებთ საგადახდო მომსახურებას, რომლის დროსაც გადამხდელისგან ფულადი სახსრების მიღება ხორციელდება მხოლოდ მიმღებისთვის ან მისი სახელით მოქმედი სხვა საგადახდო მომსახურების პროვაიდერისთვის გადასაცემად ან/და ფულადი სახსრების მიღება ხორციელდება მიმღების სახელით და უზრუნველყოფილია ამ ფულადი სახსრების მიმღებისთვის ხელმისაწვდომობა.

ვებ-გვერდის გამოყენება

გადახდის შესრულებისას, თქვენ ადასტურებთ თანხმობას, რომ იხდით კონკრეტული მიმღების მომსახურების, ან პროდუქციის საფასურს. თქვენ შეგიძლიათ განახორციელოთ ნებისმიერი გადახდა თქვენი საბანკო ბარათის მეშვეობით.

“tbcpay.ge” – ზე რეგიტრაცია თქვენ გაძლევთ შესაძლელობას, გქონდეთ თქვენი პროფილი, რისი საშუალებითაც, ჩვეულებრივი მომხმარებლისგან განსხვავებით, თქვენ შეძლებთ გადახდების ისტორიის ნახვას, გადახდების შაბლონების შექმნას და რაც ყველაზე მთავარია, შეძლებთ გადახდას უფრო მარტივად, რადგან არ მოგიწევთ იდენტიფიკაცია/ვერიფიკაციისთვის აუცილებელი ინფორმაციის თავიდან შეყვანა.

ადასტურებთ, რომ გეკუთვნით/ფლობთ ყველა საჭირო უფლებას, ნებართვას იმისათვის, რომ გამოიყენოთ და ნება დაგვრთოთ, რათა გამოვიყენოთ ნებისმიერი თქვენ მიერ მოწოდებული ინფორმაცია, ამ ხელშეკრულებისა და ინფორმაციის დაცვის პოლიტიკის შესაბამისად;

მომსახურების მიღება

ჩვენი მომსახურების მიღება ვებგვერდის საშუალებით ხელმისაწვდომია საქართველოში.

ჩვენ ვიტოვებთ უფლებას საკუთარი შეხედულებისამებრ არ დავუშვათ, ან სხვა სახით შევზღუდოთ კონკრეტული თქვენგანის მიერ ჩვენი მომსახურების მიღება.

ასევე, ვიტოვებთ უფლებას, უარი გითხრათ თქვენ კონკრეტულ შემთხვევაში, კონკრეტულ გადახდასთან დაკავშირებით, ეროვნული ბანკის მიერ საგადახდო მომსახურების პროვაიდერისთვის დადგენილი სტანდარტებიდან გამომდინარე.

მომსახურების მიღებისას, თქვენ ადასტურებთ თანხმობას, რომ იხდით კონკრეტული მიმღების მომსახურების ან პროდუქციის საფასურს. კონკრეტული გადახდის დაფიქსირებისთანავე აირჩევთ სასურველი გადახდის ფორმას და საბანკო ბარათზე ან ანგარიშზე დაიბლოკება შესაბამისი ოდენობის თანხა. ხარვეზის არსებობის შემთხვევაში თუ დროულად არ მოხდება სერვისის მიწოდება, ჩვენ მივმართავთ მიმღებს, რომლის საშუალებითაც განხორციელდა გადახდა და ვაგზავნით მოთხოვნას ხარვეზის აღმოფხვრის თაობაზე.

ვალდებულებები

თქვენ ვალდებული ხართ საგადახდო ინსტრუმენტის (ანგარიშის, კოდის, პაროლის და სხვა გადახდის განხორციელებისათვის აუცილებელი მონაცემების) დაკარგვის , მოპარვის, უკანონო მითვისების ან უკანონო გამოყენების ფაქტის აღმოჩენის შემთხვევაში მისი აღმოჩენიდან უმოკლეს ვადაში შეგვატყობინოთ ამის თაობაზე. წინააღმდეგ შემთხვევაში სრულად ხართ პასუხისმგებელი განზრახ და დაუდევრობით გამოწვეულ ნებისმიერ ზიანზე.

თქვენ ვალდებული ხართ დაიცვათ საგადახდო ინსტრუმენტის უსაფრთხოების ზომები, უზრუნველყოთ ამ ანგარიშის პერსონიფიცირებული საშუალებების დაცვა.

ჩვენ ვალდებულები ვართ მივიღოთ ყველა შესაძლო ზომა თქვენი საგადახდო ინსტრუმენტის დაცულობისა და მისი არამართლზომიერი გამოყენების თავიდან აცილების უზრუნველსაყოფად, არ გავხადოთ ანგარიშის პერსონიფიცირებული უსაფრთხოების მახასიათებლები და საშუალებები ხელმისაწვდომი სხვა პირებისათვის, გარდა ამ მათი მფლობელისა და გაგაცნოთ ანგარიშის უსაფრთხოების მოთხოვნები;

საგადახდო ინსტრუმენტის (ანგარიშის, კოდის, პაროლის და სხვა გადახდის განხორციელებისათვის აუცილებელი მონაცემების) დაკარგვის , მოპარვის, უკანონო მითვისების ან უკანონო გამოყენების ფაქტის აღმოჩენის შეტყობინების მიღების შემთხვევაში, გიდასტურებთ შეტყობინების მიღებას, თუ შეტყობინების მიღებიდან გასული არ არის 18 თვეზე მეტი. მომხმარებლის მიერ შეტყობინების მიღებისთანავე, დაუყოვნებლივ უზრუნველვყოფთ საგადახდო ინსტრუმენტის შემდგომი გამოყენების აღკვეთას

პასუხისმგებლობის შეზღუდვა

ჩვენ გვეკისრება პასუხიმგებლობა და ვალდებულება ამ ვებგვერდის მუშაობასთან დაკავშირებით, მხოლოდ იმ შემთხვევაში, თუ ეს გამოწვეული ჩვენი განზრახი ქმედებით.

თქვენ სრულად ხართ პასუხისმგებელი თქვენს მიერ ჩვენთვის საგადახდო დავალებით მოწოდებული რეკვიზიტების სისწორესა და სისრულეზე.

ლიმიტები

თუ ხართ არაიდენტიფიცირებული მომხმარებელი შეგიძლიათ საქართველოს ტერიტორიის ფარგლებში ერთჯერადად განახორციელოთ გადახდა, რომელიც არ აღემატება 1500 (ათას ხუთასი) ლარს ან მის ექვივალენტის უცხოურ ვალუტაში.

საჩივრები და შეტყობინება არაავტორიზებული ან არასწორად განხორციელებული გადახდის ოპერაციის შესახებ

თქვენ უფლება გაქვთ მოგვთხოვით არაავტორიზებული ან არასწორად განხორციელებული ოპერაციის შესაბამისი თანხის ანაზღაურება, იმ შემათხვევაში, თუ არაავტორიზებული ან არასწორად შესრულებული ოპერაციის თანხით ანგარიშის დადებეტებიდან არ გასულა 13 თვეზე მეტი და არაავტორიზებული ან არასწორად განხორციელებული ოპერაციის აღმოჩენიდან გაუმართლებელი დაყოვნების გარეშე გვაცნობეთ ამგვარი ოპერაციის შესახებ.

არაავტორიზებული ან არასწორად შესრულებული გადახდის შემთხვევაში შეგიძლიათ დაგვიკავშირდეთ ცხელ ხაზზე: (+032) 2 27 27 27, შეგვატყობინოთ არაავტორიზებული ან არასწორედ შესრულებული ოპერაციის შესახებ და მოგვაწოდოთ შემდეგი სახის ინფორმაცია: გადახდის განსახორციელებლად მითითებული რეკვიზიტი (მაგ. პირადი ნომერი, აბონენტის ნომერი და ა.შ. რაც, შეიყავნეთ არჩეულ საგადახდო მომსახურებაზე), ჩარიცხული თანხის ოდენობა და მიმღების დასახელება, ვის სასარგებლოდაც მოხდა გადახდის მიღება.

თქვენ უფლება გაქვთ ჩვენი სისტემის მეშვეობით განხორცილებეულ ნებისმიერ გადახდასთან დაკავშირებულ საკითხებზე, საჩივრით მოგვმართოთ თქვენთვის სასურველი ფორმით (ზეპირი, წერილობითი/ელ ფოსტით). თიბისი ფეი საჩივარს განიხილავს მომართვიდან 15(თხუთმეტი) სამუშაო დღის ვადაში (შესაძლოა გახანგრძლივდეს არაუმეტეს 20 კალენდარული დღით).

კანონმდებლობისა და ამ ხელშეკრულების საფუძველზე ჩვენ ვიღებთ გადაწყვეტილებას გადახდილი თანხის დაბრუნების/არ დაბრუნების შესახებ, რომელიც გეცნობებათ. დადებითი გადაწყვეტილები მიღების შემთხვევაში შეგატყობინებთ შესაბამის ინფორმაციას, რომლის საფუძველზეც შეძლებთ მიიღოთ თანხა. თქვენი სურვილის შემთხვევაში შესაძლებელია თანხის გადარიცხვა თქვენს მიერ შემოთავაზებულ ანგარიშზე/მობილური ტელეფონის ნომერზე.

თქვენ უფლება გაქვთ გადახდებთან დაკავშირებით, თიბისი ფეითვის საჩივრით მიმართვის დღიდან არაუგვიანეს 6 თვის განმავლობაში, საგადახდო მომსახურების პროვაიდერის წინააღმდეგ საჩივრით მიმართოთ საქართველოს ეროვნულ ბანკთან არსებულ დავების განმხილველ კომისიას, თქვენს მიერ თიბისი ფეისთვის წარდგენილი საჩივრის დადგენილ ვადაში დაუკმაყოფილებლობის (მათ შორის, პასუხის გაუცემლობის) ან ნაწილობრივ დაკმაყოფილების შემთხვევაში.

თქვენ უფლება გაქვთ მიმართოთ კომისიას, თუ თქვენი მოთხოვნა არ აღემატება 50 000 ლარს ან 50 000 ლარის ეკვივალენტს უცხოურ ვალუტაში. კომისია დავას განიხილავს და გადაწყვეტილებას იღებს საჩივრის წარმოებაში მიღებიდან 90 კალენდარული დღის ვადაში (შესაძლოა გახანგრძლივდეს 30 კალენდარული დღით). კომისია დავას განიხილავს უსასყიდლოდ.

თქვენ უფლება გაქვთ მიმართოთ სასამართლოს, კომისიისთვის მიმართვის გარეშეც.

შეზღუდვები ვებგვერდის გამოყენებისას

ჩვენ არ გავცემთ გარანტიას იმაზე, რომ ამ ვებგვერდით ონლაინ გადახდების მომსახურება იმუშავებს შეცდომების ან შეფერხებების გარეშე.

ვებგვერდზე შესვლის შეფერხება შეიძლება გამოწვეულ იქნეს: კომპიუტერების, სერვერების, ქსელების, ტელეკომუნიკაციის ხაზების, კავშირგაბმულობის და სხვა აღჭურვილობის გაუმართაობით.

ასევე, სისტემის გადატვირთულობით, ზიანით, რომელიც გამოწვეულია სტიქიური მოვლენებით, უამინდობით, უბედური შემთხვევით, ომით, აჯანყებით, არეულობით, ტერორისტული აქტით, მთავრობის ან კანონმდებლობით დაწესებული შეზღუდვებით, სასამართლო გადაწყვეტილებებით ან ნებისმიერი სხვა მიზეზით, რომელიც არ არის ჩვენს მიერ კონტროლირებადი და ჩვენი ბრალით გამოწვეული

ასეთ შემთხვევებში, გთხოვთ გაითვალისწინოთ, რომ თქვენ შეიძლება, ვერ შეძლოთ, მომსახურების მიღება და გადახდა დასრულდეს წარუმატებლად. აქედან გამომდინარე, გთხოვთ, თავი შეიკავოთ ვებგვერდის გამოყენებისაგან/ონლაინ საგადახდო მომსახურების მიღებისაგან. იმ შემთხვევაში, თუ აღნიშნული გარემოებების მიუხედავად, თქვენ მაინც აგრძელებთ ვებგვერდით სარგებლობას, დამდგარ შედეგებზე და რისკზე პასუხიმგებელი ხართ თქვენ.

ინფორმაციის დამუშავება

ჩვენი მომსახურებით სარგებლობისას, ჩვენ ვიღებთ/გვაწვდით შემდეგი სახის ინფორმაციას:

  • სახელი და გვარი;
  • პირადი ნომერი;
  • პირადობის მოწმობის, პასპორტის, ამავე ელექტრონული საბუთის უნიკალური მახასიათებლები ან/და ასლი;
  • პირადი ელექტრონული ფოსტის მისამართი;
  • ტელეფონის ნომერი;
  • საკონტაქტო ცნობარი;
  • იურიდიული/ფაქტობრივი მისამართი;
  • ბანკის ანგარიშების რეკვიზიტები;
  • სხვა ის ინფორმაცია, რომელიც ასევე ერთობლიობაში იძლევა პირის პერსონალური იდენტიფიცირების საშუალებას ან/და საჭიროა კომპანიასთან ურთიერთობის მცდელობის ან საბოლოოდ გარიგების დადების მიზნებისთვის.

ჩვენ უფლება გვაქვს თქვენს მიერ ვებგვერდზე მოწოდებული ინფორმაცია გავუმჟღავნოთ და გადავცეთ:

  1. ჩვენთან აფილირებულ ნებისმიერ პირს და მის უფლებამოსილ წარმომადგენელს;
  2. ნებისმიერ სხვა პირს ან ორგანიზაციას თქვენი თანხმობით;
  3. შესაბამის პირს ან ორგანოს კანონმდებლობით გათვალისწინებულ შემთხვევაში ინფორმაციის გაცემის უფლების ან ვალდებულების არსებობისას, როგორიცაა მაგალითად სასამართლო, არბიტრაჟი და სხვა.

ჩვენ უფლება გვაქვს დავამუშავოთ თქვენი პერსონალური მონაცემები პერსონალურ მონაცემთა დაცვის შესახებ საქართველოს კანონის მე-5 მუხლის „ა“ პუნქტის შესაბამისად, თქვენთვის მომსახურების გაწევის მიზნით.

თქვენს მიერ ამ ვებგვერდით სარგებლობა ან ნებისიმიერი ინფორმაციის მიწოდება მიიჩნევა თქვენ მიერ ინფორმაციის ამგვარ გადაცემაზე თანხმობად.

თქვენ აცნობიერებთ, რომ ნებისმიერ დროს შეგიძლიათ ნაწილობრივ ან მთლიანად უარი განაცხადოთ თანხმობაზე ან უკან გამოითხოვოთ უკვე გაცემული თანხმობა, შეგიძლიათ, მოითხოვოთ დამატებითი ინფორმაციის მიღება თქვენს შესახებ დამუშავებულ პერსონალურ მონაცემებზე შემდეგ ელ. ფოსტის მისამართზე მიმართვით: callcenter@tbcpayge.ge ასევე, გაქვთ უფლება, მოითხოვოთ, მონაცემთა გასწორება, განახლება, დამატება, დაბლოკვა, წაშლა, განადგურება, პროცესის შეზღუდვა, დამუშავების შეწყვეტა და მონაცემების გადატანა.

თქვენ აცნობიერებთ, რომ თქვენი თანხმობის გაუქმება გავლენას არ ახდენს გაუქმებამდე თანხმობის საფუძველზე მონაცემთა დამუშავების კანონიერებაზე.

ჩვენ მიერ თქვენი ავტორიზაციისას, ჩვენ ვაგროვებთ ორი სახის ინფორმაციას ჩვენი მომხმარებლების შესახებ: პირადი მაიდენტიფიცირებელი ინფორმაცია და არაპირადი მაიდენტიფიცირებელი ინფორმაცია.

პირადი მაიდენტიფიცირებელი ინფორმაცია

პირადი მაიდენტიფიცირებელი ინფორმაცია არის ის, რომლის მეშვეობითაც ხდება კონკრეტული მომხმარებლის იდენტიფიკაცია, მაგალითისთვის: თქვენი სახელი და გვარი, პირადი ნომერი, ელექტრონული ფოსტის მისამართი, სქესი და დაბადების თარიღი, ბარათის ნომერი, ვადის გასვლის თარიღი, ავთენტურობის კოდი, ტრანზაქციების ისტორია ან სხვა შესაბამისი ინფორმაცია.

არაპირადი მაიდენტიფიცირებელი ინფორმაცია

არაპირადი მაიდენტიფიცირებელი ინფორმაცია არის ის, რომელიც არ ახდენს კონკრეტული მომხმარებლის იდენტიფიკაციას. ამ სახის ინფორმაცია შეიძლება მოიცავდეს იმ ბრაუზერის სახეობას, რომელსაც თქვენ იყენებთ და თქვენი ინტერნეტ პროტოკოლის „IP“ მისამართს. ჩვენ ან/და ჩვენს მიერ უფლებამოსილ, მესამე მხარე, მომსახურების პროვაიდერებს შეუძლიათ, ავტომატურად მიიღონ ეს ინფორმაცია.

ინფორმაციის განახლება და შეცვლა

თქვენ შეგიძლიათ შეცვალოთ თქვენი ნებისმიერი პირადი საიდენტიფიკაციო ინფორმაცია ვებგვერდზე თქვენი პროფილის შესაბამის განყოფილებაში შესვლით.

დასკვნითი დებულებები

ამ ხელშეკრულებაში ცვლილებების შეტანა შესაძლებელია ვებ-გვერდზე www.tbcpay.ge გამოქვეყნების გზით, რომელიც ძალაში შედის მისი გამოქვეყნებიდან 1(ერთი) კალენდარული თვის შემდეგ.

ხელშეკრულების პირობებში განხორციელებული ნებისმიერი ცვლილება ჩაითვლება თქვენთან შეთანხმებულად, თუ ცვლილების ძალაში შესვლამდე არ განაცხადებთ უარს დაგეგმილი ცვლილების თაობაზე. ცვლილებების ამოქმედებამდე, უფლება გაქვთ შეწყვიტოთ ეს ხელშეკრულება დაუყოვნებლივ ყოველგვარი საკომისიოს, ხარჯის და პირგასამტეხლოს გადახდის გარეშე.

ჩვენ, ცვლილებებზე თქვენი უარის შემთხვევაში უფლებამოსილი ვართ შევწყვიტოთ ეს ხელშეკრულება ცვლილებების ამოქმედების თარიღის შემდეგ.

თქვენ უფლება გაქვთ შეწყვიტოთ ეს ხელშეკრულება ნებისმიერ დროს 30 (ოცდაათი) კალენდარული დღით ადრე ჩვენთვის შეტყობინების გზით.

ჩვენ უფლება გვაქვს შევწყვიტოთ ეს ხელშეკრულება ნებისმიერ დროს 30 (ოცდაათი) კალენდარული დღით ადრე თქვენთვის შეტყობინების გზით.

ეს ხელშეკრულება მოქმედებს რომელიმე მხარის მიერ მისი შეწყვეტის მომენტამდე.

წინამდებარე ხელშეკრულებაზე დათანხმებით და ვებგვერდის საშუალებით ჩვენი მომსახურების მიღებისას, ითვლება, რომ ხელშეკრულება დადებულია საქართველოში, კერძოდ ქ.თბილისში და დავის არსებობის შემთხვევაში მას განიხილავს ქ.თბილისის საქალაქო სასამართლო, საქართველოს კანონმდებლობის შესაბამისად.

თქვენ არ შეგიძლიათ, რომ წინამდებარე ხელშეკრულება ან ხელშეკრულებით თქვენთვის მონიჭებული უფლებები და მოვალეობები მთლიანად ან ნაწილობრივ გადასცეთ მესამე მხარეს ჩვენი წინასწარი წერილობითი ნებართვის გარეშე.

თქვენს მიერ ასეთი ქმედების ნებისმიერი მცდელობა იქნება ბათილი.

შპს „თიბისი ფეი“

საიდენტიფიკაციო კოდი: 204559361

სარეგისტრაციო ნომერი: 0005-9004

იურიდიული მისამართი: ქ.თბილისი, მარჯანიშვილის ქ.#7;

ფაქტობრივი მისამართი: ქ.თბილისი, ვაჟა-ფშაველას IV კვარტალი, 3 გ.

ელექტრონული ფოსტა: info@tbcpay.ge

თქვენ უფლება გაქვთ მიიღოთ 2016 წლის 06 იანვრის №1/04 საქართველოს ეროვნული ბანკის პრეზიდენტის ბრძანებით დამტკიცებული „საგადახდო მომსახურების განხორციელებისას მომხმარებლისთვის აუცილებელი ინფორმაციის მიწოდების წესი“-თ განსაზღვრული ინფორმაცია და ინფორმაცია ჩარჩო ხელშეკრულების პირობების შესახებ, რომელიც თქვენთვის ხელმისაწვდომია 24 საათის განმავლობაში ვებ გვერდის (www.tbcpay.ge) საშუალებით.

საზედამხედველო ორგანოები:

საქართველოს ეროვნული ბანკი, ვებგვერდის მისამართი:www.nbg.gov.ge

საქართველოს ფინანსური მონიტორინგის სამსახური, ვებგვერდის მისამართი:www.fms.gov.ge

გთხოვთ გაითვალისწინოთ:

საზედამხედველო ორგანოები არცერთ შემთხვევაში არ არიან პასუხისმგებელნი ჩვენს მიერ ვალდებულებების არაჯეროვან შესრულებაზე.

ეს ხელშეკრულება დადებულია და რეგულირდება ქართულ ენაზე.

მოქმედი მომსახურების ხელშეკრულების სანახავად დააჭირეთ აქ